As xornadas 100 anos de memoria. Sofía Casanova, reporteira de guerra, que terán lugar os vindeiros 15 e 16 de decembro no CGAI da Coruña e no Consello da Cultura Galega en Santiago de Compostela.
No centenario da I Guerra Mundial, tamén chamada “la Grande Guerre”, cómpre, ademais de situar os feitos, os acontecementos e a memoria, identificar e visibilizar as persoas que tiveron un papel relevante na transmisión de información nese momento. Este é o caso de Sofía Casanova (A Coruña, 1861 – Poznan, 1958), reporteira na fronte oriental (Rusia, Polonia, etc.), que realizou as crónicas que permitiron ao xornal ABC dar información periódica, veraz e documentada sobre a contenda. Esta muller, pioneira no seu traballo xornalístico, forma parte desas primeiras reporteiras esquecidas e invisibilizadas que están preto dos campos de batalla para elaborar un traballo que implica importantes dificultades.
O documental-ficción A maleta de Sofía, dirixido por Marcos Gallego, aborda a inmensa tarefa vital, profesional, familiar e literaria dunha destas mulleres: Sofía Casanova. A complexidade das súas ideas e posicionamentos na súa vida, o seu inmenso mundo de relacións e tertulias, en Madrid, Polonia e na Galiza. Son máis de noventa anos de vida, amosados neste filme, cunha inmensa riqueza de visións e opinións. Os tempos que Sofía viviu foron tempos mudábeis, de catástrofes e de novos proxectos. O documental vai pasando por todos eles, situando a Sofía Casanova no seu percorrer vital, profesional, persoal e cunha calidade de contidos e de imaxe que fan da súa visión un repaso pola Europa convulsa do século XX. Unha viaxe iniciática, sempre na compaña da maleta.
Coa proxección de A maleta de Sofía e debates propostos nestas xornadas, o Consello da Cultura Galega, a través da súa Comisión de Igualdade, quere contribuír á difusión e re-coñecemento da vida e obra desta importante xornalista.
Luns, 15 de decembro
Centro Galego de Artes da Imaxe
A Coruña
20:00 horas
Presentación: Narciso de Gabriel
Proxección A maleta de Sofía
Mesa redonda: María Filipowicz-Rudek e Rosario Martínez Martínez
Martes, 16 de decembro
Consello da Cultura Galega
Santiago de Compostela
17:00 horas
Presentación: Encarna Otero Cepeda
Proxección A maleta de Sofía
Mesa redonda: María Filipowicz-Rudek, Marcos Gallego e Marta Pérez Pereiro