Desde o luns 13 ata o vindeiro 29 de febreiro, o Mosteiro de Santa Catalina do Concello de Ares, o Castelo de San Felipe e a praia de Doniños de Ferrol, as Fragas do Eume e Cabanas converteranse nos platós de rodaxe de A visitadora de prisións.

Protagonizada por Blanca Portillo e dirixida por Laura Mañá, A visitadora de prisións é unha película para televisión producida por Zenit TV e Distinto Films, coa produción executiva de Miriam Porté e Zaza Ceballos, en coprodución con Televisión de Galicia, Televisió de Catalunya e Televisión Española. Tamén recibiu o apoio do ICAA, da Consellería de Cultura e Secretaría de Igualdade da Xunta de Galicia, do ICIC e do Instituto de la Mujer.

Acompañan á actriz protagonista a ferrolá Mabel Rivera, que interpreta a Juana de Vega e Pere Arquillué, que encarna a Garrido, o alcaide da prisión. Con eles participan Xosé Barato, Luísa Merelas, Isabel Naveira, Paula Carballeira, Patricia Vázquez, Dani Lago, Anna Casas, Diana Gómez, Óscar Rabadán, Candela Fernández, Fermí Reixach e Juanma Lara, entre un nutrido grupo de actores.

O elenco está apoiado pola participación de máis de 100 figurantes procedentes na súa meirande parte da bisbarra de Ferrolterra, que recrearán o ambiente decimonónico no que se desenvolve a historia. Tras dúas semanas de rodaxe en Barcelona, o equipo de A visitadora de prisións seguirá o seu traballo en Galicia durante tres semanas máis.

 

A loita pola dignidade humana

A visitadora de prisións, ambientada a mediados do século XIX, recrea a época na que a avogada e escritora Concepción Arenal traballou como visitadora de prisións de mulleres na Coruña, o que daría como froito algunhas das súas obras clave que habían de servir de base para a reforma do sistema penal imperante en España. A película, que rescata esta figura fundamental na historia dos séculos XIX e XX, ten como escenario principal unha prisión de  mulleres, buscando retratar con fidelidade as duras condicións de vida nos presidios da época. Axudada pola ficción, A visitadora de prisións pretende reflectir a influencia que a obra social e ensaística de Concepción Arenal exerceu no cambio desta penosa realidade.