O estreo da nova tempada de Padre Casares situou á serie como o máis visto en Galicia en horario de máxima audiencia na noite do pasado luns. Cun share do 22.1% e máis de 246.000 espectadores, a ficción de Voz Audiovisual regresaba á pequena pantalla tralas vacacións de verán demostrando que segue sendo a serie favorita dos galegos por diante de calquera produción nacional ou estranxeira.
No seu regreso, Padre Casares logrou superar a Isabel avantaxándoa en case 100.000 espectadores. A ficción histórica de TVE tivo que conformarse co segundo posto na lista de preferencia dos galegos logrando unha cota de pantalla do 13.8% e 148.000 espectadores. Tras ela situábase Antena 3 que, con Pulseras Rojas, anotaba un 10.5% e congregaba no adeus da serie a 106.000 espectadores fronte ao televisor.
Durante o momento máis visto do capítulo do pasado luns de Padre Casares, a serie de Voz Audiovisual lograba reunir a case a metade de persoas que nese momento estaban vendo a televisión en Galicia. O minuto de ouro rexistrábase ás 22:57 horas e congregaba a 273.000 espectadores e anotaba unha cota de pantalla do 47%.
O pasado mes de abril Padre Casares finalizaba a emisión da súa décima tempada sendo a opción favorita dos galegos a noite do luns e deixando pendentes de clausúraa da igrexa do pobo a uns espectadores que este luns reencontráronse cun don Crisanto máis combativo e reivindicativo que nunca, acampado no atrio parroquial en sinal de protesta.
“Louredo Responde” tamén volve con forza
O regreso dos habitantes de Louredo á pequena pantalla foi un éxito absoluto. Ademais do gran seguimento ao episodio de Padre Casares, “Louredo Responde”, o espazo que responde ás preguntas dos espectadores sobre os personaxes da serie e que se emite xusto antes de cada capítulo, logrou un 18.1% de share e 205.000 espectadores.