Abordaremos os desafíos que implica o emprego a IA da man de expertos de relevancia internacional como Asa Bailey, supervisor de producción virtual de Netflix, quen será o encargado de impartir a conferencia inaugural. Nela explicará como posicionar os proxectos nun entorno inundado de contidos de calidade e como o emprego de intelixencia artificial na produción vai afectar á cadea de valor. Ademais da súa vinculación con Netflix, Bailey desenvolve a súa traxectoria profesional en empresas como Apple TV, NBC Universal, OSF Future ou Saatchi & Saatchi.
O programa continuará cun relatorio de Óscar Olarte, cofundador de MR Factory, quen fará un repaso das principais ferramentas que empregan IA para acelerar tarefas de pre-produción, produción e post-produción; os avogados Víctor Salgado e Francisco Menéndez explicarán a produtores, guionistas e creadores de contido a problemática que presenta o emprego de IA xerativa para a propiedade intelectual. Amparo Alonso e Fernando Suárez, especialistas en intelixencia artificial, abordarán as implicacións éticas do uso da tecnoloxía na industria do entretemento con representantes de AAAG, AGAG e o CLAG; Carlos F. de Vigo e Pepe Coira falarán dos últimos desenvolvementos en IA e dos desafíos que implica a súa utilización nun relatorio dirixido a guionistas e profesionais da dirección e a realización audiovisual; Gabriel Olarte e Elba Fernández explorarán as ferramentas que a Intelixencia Artifical pon a disposición de compositores e compositoras de bandas sonoras. O foro finalizará cunha mesa redonda sobre interpretación, na que despois dunha presentación a cargo de David Guaita de El Ranchito, se abrirá un diálogo coa avogada Nerea Sanjuan e representantes de AAAG e APRADOGA sobre os retos e inquedanzas que estas aplicacións supoñen para o sector. Coñeceremos tamén proxectos galegos que están a empregar a Intelixencia Artificial nos seus procesos de traballo, como Serea Film, o Grupo de Estudos Audiovisuais, Abano Producións, Medretia e PLAT VR.
O prazo de inscrición estará aberto ata o vindeiro luns 6 de novembro. Para calquera consulta relativa á asistencia a FIGA está habilitado o correo actividades@academiagalegadoaudiovisual.gal.
Ligazón ao Formulario de inscrición.