A Academia Galega do Audiovisual e as catro deputacións galegas volven premiar, por quinto ano consecutivo, a excelencia na investigación científica no ámbito audiovisual convocando os V Premios María Luz Morales de Ensaio e Videoensaio sobre o Audiovisual.
As persoas interesadas en participar na presente edición, poden presentar os seus ensaios escritos e/ou os seus videoensaios sobre temática galega ou internacional dende hoxe ata o vindeiro 3 de maio a través do correo inscricions@academiagalegadoaudiovisual.gal. Os traballos gañadores nas categorías de Mellor ensaio escrito sobre audiovisual galego, Mellor ensaio escrito sobre audiovisual internacional, Mellor videoensaio sobre audiovisual galego e Mellor videoensaio sobre audiovisual internacional, recibirán unha estatuíña conmemorativa e 1.200 euros
Podedes consultar aquí as bases desta edición e aquí as cláusulas de protección de datos.
Os premios, que contan co apoio das Deputacións provinciais da Coruña, Lugo, Ourense e Pontevedra, naceron en 2017 para estimular a produción de ensaio e videoensaio en lingua galega e para reivindicar a figura da escritora e xornalista María Luz Morales (A Coruña, 1889 – Barcelona 1980). Especializada na crítica de cine e de teatro, dirixiu o xornal La Vanguardia durante a Guerra Civil, sendo a primeira muller na historia de España en ser directora dun diario estatal. Foi activista feminista, republicana e galeguista represaliada polo franquismo, e autora dunha extensa obra literaria. Considerada unha referencia da incorporación da muller a actividade xornalística e intelectual na España do século XX, mantívose en activo ata os 91 anos de idade.