O CGAI PRESENTA “ELOGIO DE LA ESCUELA” DENTRO DE CGAI JÚNIOR

13 / 10 / 2011

O Centro Galego de Artes da Imaxe presenta, dentro da sección CGAI JÚNIOR, mañá venres 14 de outubro (18.00 horas) Elogio de la escuela, sobre a Escola de Bordils. Durante a proxección contaremos coa presenza de Carme Congost e Dolors Vilanova, as mestras que encabezan o proxecto na escola, e Núria Aidelman e Laia Colell, da asociación A Bao A Qu, que asesorou e acompañou o proceso de creación do filme. A entrada é gratuíta.

 

A película é unha oportunidade para ver o traballo por proxectos que desenvolven na escola, como aprenden e investigan os alumnos, como razoan, argumentan, reflexionan. Tamén é unha mostra privilexiada de como se poden vehicular transversalmente contidos de materias e disciplinas diversas a través do traballo coa fotografía e o cine. Por iso é un filme especialmente interesante para todos os mestres interesados en metodoloxías pedagóxicas innovadoras e na introdución da creación artística na escola.

O Centro Galego de Artes da Imaxe organiza tamén un encontro con profesores de infantil e primaria o sábado 15 de outubro (10.00 horas) para profundizar nas posibilidades que o cine e a fotografía ofrecen para traballar nas aulas. A formación será impartida por Núria Aidelman e Laia Colell da Asociación A Bao A Qu xunto con Carme Congost e Dolors Vilanova (mestras da Escola de Bordils). Pártese de que facer cine é filmar, fotografar, montar pero tamén é mirar, escoitar, imaxinar, pensar, escribir, relacionarse, compartir. Facer cine pode ser inventar unha historia mirando un cadro, observar a luz ou fotografar as cores do ámbito máis próximo. Por iso, daranse instrumentos prácticos e metodolóxicos para traballar o cine e a fotografía con alumnos de entre 3 e 10 anos, facendo especial fincapé na capacidade da creación audiovisual para artellar contidos transversais e moi especialmente, a expresión oral e escrita. A formación apoiarase en exemplos prácticos e nalgúns dos traballos elaborados na Escola de Bordils nos últimos 5 anos.
Os profesores que queran acudir ao encontro do sábado 15 poden reservar praza no CGAI a través do correo electrónico info@cgai.org ou no teléfono 881 881 269 (Mónica García Iglesias).

ELOGI DE L’ESCOLA. A L’ ESCOLA DE BORDILS EN EL SEU 75è ANIVERSARI / ELOGIO DE LA ESCUELA. DE LA ESCUELA DE BORDILS EN SU 75º ANIVERSARIO    
(España, 2010)
Dirección, guión, produción e fotografía: alumnos de P3 a 6º da Escola de Bordils acompañados de sus mestres, co asesoramento da asociación A Bao A Qu. Duración: 53 minutos.  
A escola de Bordils construiuse hai 75 anos. Traballa a fotografía e o cine en todos os cursos desde hai dez anos. Alumnos e mestres decidiron realizar unha película para celebrar o aniversario. Os alumnos (de 3 a 12 años) investigaron, fotografiaron, filmaron, documentaron, escribieron, recordaron, investigaron e reflexionaron sobre a escola e a súa historia. Cada clase realizou e montou unha ou máis pezas cinematográficas con estes materiais. O filme é unha selección das máis de cinco horas que suman estas pezas. A asociación A Bao A Qu, que traballa coa escola desde 2005 levando a cabo Cinema en curs, colaborou no proxecto asesorando e realizando a montaxe final a partires das pezas ideadas, realizadas e montadas polos alumnos.

Categoría: Noticias
Etiquetas: