Editorial Galaxia incorporouse a AGAPI (Asociación Galega de Produtoras Independentes). A compañía Editorial Galaxia conta con sesenta anos de experiencia no eido da edición e agora amplía a súa actividade ao audiovisual coa incorporación a AGAPI.

Editorial Galaxia defendeu ao longo destes sesenta anos un compromiso coa cultura galega, demostrado polo feito de que a compañía inviste todos os beneficios en novos proxectos. A empresa creou a área de negocio Galaxia Producións para desenvolver proxectos audiovisuais.

A súa actividade iniciouse coa realización dos títulos pedagóxicos “Como se fai un libro” e “A ilustración na literatura infantil en galego” para sendas exposicións. Tamén realizaron a curtametraxe “O muíño abandonado” e o documental “Llanos”, e contan no seu catálogo co proxecto de longametraxe “A mirada de Castelao”.

AGAPI, como asociación de importante traxectoria no sector audiovisual galego e estatal, representa a máis de trinta empresas produtoras de cine, televisión, publicidade e servizos.